Radunanza generèla de l'Istitut Cultural Ladin

L’Istitut envia duta la comunanza a sia Radunanza Generèla.

N apuntament de valuta olache vegnarà prejentà i resultac de sia atività e tout sù idees e reflescions per l davegnir.

Desche ogne an, l’Istitut tegnarà sia Radunanza Generèla perveduda dal Statut, chiamèda ite dal Consei de Aministrazion e da la Comiscion Culturèla per prejentèr i resultac de sia atività e tor sù idees e reflescions per l davegnir.

L'apuntament de chest an l’à n segnificat particolèr, ajache l diretor dr Fabio Chiocchetti te pech temp fenirà si mandat dò caranta egn de servije.

Se pel ampò dir che i prodoc e la scomenzadives che vegnarà prejentà te chesta ocajion raprejenta donca l travert de na lingia de projec che per egn a la longia à compagnà la vita de l'Istitut e del Museo ladin.

Dò l salut de la Presidenta, avocata Lara Battisti, vegnarà prejentà la neva publicazions vegnudes fora via per chest an, en particolèr: - Rita Gratl, Il Giudizio di Fassa negli atti del Principato vescovile di Bressanone, (orig. 1975) co la partezipazion de l’Autora e de la curadora Angela M. Mura; - Cesare Poppi, Saggi di antropologia ladina e alpina, jà prejentà dantfora al cors de auta formazion “Antropolad”, edizion 2019-2020; - “Mondo Ladino” 2019 – ANTROPOLAD, regoeta de studies e contribuc luré fora dai partezipanc ai corsc de l'edizion 2017-2019; - Calandèr Ladin 2020 “L Bosch”, a cura de Alberta Rossi e Nives Iori, co la partezipazion di fotografes che à colaborà a l'edizion.

Per chel che revèrda l lurier da chiò inant, vegnarà portà dant i projec de carater strategich fondamentèi per la finalitèdes de l'Istitut (VOLF “Vocabolèr del Ladin Fascian”; Projet “Archif”), e vegnarà prejentà la scomenzadives editorièles pervedudes per l 2020 e la prospetives de svilup e de valorisazion del Museo Ladin.

Tinultima vegnarà proietà dantfora l filmat “La vivana e l cian” tout fora da na veiora contìa populèra binèda sù da Amadio Calligari del 1891, realisà da “490 Studio” co la partezipazion de atores fascegn e destinà a n nef alestiment museal te Sala 5 “I tempes neves”, che sarà metù a jir chisc meisc per ge dèr n nef sbunf al Museo Ladin de Fascia dal pont de veduda emozional.

Tegnù cont de chest termin emportant, envion de cher i raprejentanc istituzionèi, i esponenc de la sociazions, de la categorìes economiches e turistiches, del mond de la scola e del mond culturèl ladin a tor pèrt a chesta scontrèda, da olache pearà via n nef percors che tel davegnir portarà l'Istitut envers neva endesfides e neves obietives.